Тере-Хөл кожуунда Улуг-Кежиг деп черде Каргы хемни кежир 90 метр ыяш көвүрүгнүң тудуу уламчылап турар. Ол ышкаш Балыктыг сумузунда “Көдээ девискээрлерни комплекстиг хөгжүдери” деп күрүне программазының ачызында спортчу болгаш ойнаар дерилгелиг шөлчүгешти туткан.
Тере-Хөл кожууннуң чагырга даргазының хүлээлгезин күүседип турар Тумен Ховалыг кожуунда чаартылгалар дугайында @tmgnews17 таныштырган.
– Каргы хемни кежилдир улуг көвүрүгнү тудуу уламчылап турар. Тажылың деп черде көвүрүг тудуу колдуу доозулган, чүгле кыдыын хаялаары арткан. Автомашиналар аргыжып эгелээн. Ук ажылдарны хууда сайгарлыкчылар Артыш Иргит база Ужар-оол Иргит чорудуп турар.
Аргыжылга талазы-биле байдал эки. Чаъс шоолуг чагбайн турар болгаш Нарын, Каргы, Балыктыг хемнер элээн сыыгай берген. Орукту «Ойна» алдын тывыш артелиниң күчүлүг техниказы-биле дескиледир үстүрүп каан.
Кунгуртугда чаартылга ажылдары чоруттунуп турар. Чаа адрести тургускан, «Кунгуртугга ынак мен» деп стелага чырыкты кожары база көрдүнүп турар. Кожууннуң ыраккы сумуларының бирээзи – Балыктыг сумузунда спортчу болгаш ойнаар дерилгелиг шөлчүгешти ажыглалга киирген.
Амгы үеде Кунгуртугда уруглар садының тудуу, төп кожуун эмнелгезиниң капитал септелгези дээш оон-даа өске ажылдар кылдынып турар.
