Тываның Күрүнениң юридиктиг бюрозунуң юристери амыдыралдың берге байдалынга таварышкан хамаатыларга халас юридиктиг дуза чедирер хемчеглерни боттандырарын уламчылап турарын бюро дыңнаткан.
Бо удаада үнүүшкүннүг консультация Россияның кеземче күүселдезиниң Тывада эргелелиниң Шагаан-Арыгда 4 дугаар эдип-чазаар колонияның девискээринге эрткен.
Ужуражылга үезинде юристер шииттиргеннерниң хууда хүлээп алыышкынын эрттирген. Кол кичээнгейни социал эргелерге хамаарышкан амгы хоойлужудулганың нормаларын тайылбырлаарынче угландырган.
Юристер дилег кииргеннерниң айтырыгларынга тодаргай харыыларны берген. Олар таварылга бүрүзүн бирден бирээ чокка сайгарып, сүмелерин берип, хоойлу езугаар эрге-ажыктарны камгалаары-биле моон соңгааргы базымнарны тайылбырлаан.
Күрүнениң юридиктиг бюрозунуң кол сорулгазы – эрге-хоойлу тайылбырларын бээри (аас болгаш бижимел), юридиктиг документилерни (билдириишкиннер, хомудалдар, дилег бижиктер) тургузары, судтарга, күрүне болгаш муниципалдыг органнарга хамаатыларның чамдык бөлүктериниң сонуургалдарын төлээлээри.
Халас юридиктиг ачы-дузаны эвээш орулгалыг хамаатылар, I, II бөлүктүң, хары угда көөрү болгаш дыңнаары багай III бөлүктүң инвалидтери, өскүс уруглар болгаш оон-даа өске чиигелделиг категорияларга хамааржыр улус ап болурун сагындыраалы. Харылзажыр телефону: 8 (39422) 6-00-16.