«Өзүлдениң демдээ» өөредилге төптери ажыттынар

Бии-Хем кожуунда “Өөредилге” национал төлевилели-биле Сесерлиг болгаш Туран хоорайның 2 дугаар школаларының үндезин септелгезин чорудуп турар.

«Өөредилге» национал төлевилелиниң «Амгы үениң школазы» деп федералдыг төлевилел-биле Тарлаг база Хадың школаларынга «Өзүлдениң демдээ» өөредилге төптери ажыттынарын кожууннуң чагырга даргазының хүлээлгезин күүседип турар Владимир Байыр-оол дыңнаткан.

Кабинеттерниң септелгезин болгаш ооң дериин садар акшаландырыышкынны кожуун бюджединден үндүрүп турар.
«Өзүлдениң демдээн» школачыларның, башкыларның база ада-иелерниң чогаадыкчы болгаш төлевилел ажыл-чорудулгазынга хөй-ниити делгемнери кылдыр ажыглап болур.

Тываның школаларында чаа өөредилге чылынга белеткел ажылдары уламчылап турар. Бии-Хемниң чагырга чериниң удуртулгазы тудуг сезонунуң кыска хуусаалыын барымдаалап, хүлээникчи тудуг организациялары ажылын шынарлыг болгаш үезинде күүседиринче кичээнгейни угландырарын айткан.