Үжен чыл төөгүлүг ат

Россия Федерациязының Маадыры хүндүлүг ат болза, дээди шылгаралдың демдээ болур. Ону 1992 чылдың март 20-де Россия Федерациязының Хоойлузу-биле доктааткан. Россия Федерациязының Маадыры ат Совет Эвилелиниң Маадыры болгаш 2013 чылга чедир Социалистиг Күш-ажылдың Маадыры аттарны солаан. Совет Эвилелиниң ол аттарын дүжүрериниң дугайында документилер хүлээп алдынмаан.

Россия Федерациязының Маадыры хүндүлүг атты маадырлыг чорукту кылганы-биле, ооң иштинде өлгениниң соонда, холбаштыр күрүнениң болгаш чоннуң мурнунга ачы-хавыяазы дээш РФ-тиң президентизи тыпсыр. Ат тыпсыышкынын күш-ажылчы шылгаралы (чижээлээрге, техниканы ажылдап кылганы болгаш ону шенээни дээш), спорт адырынга чедишкиннери дээш база тыпсып турар. Ол ышкаш ук атты Совет Эвилелиниң Маадыры атка төлептиг болган, ынчалза-даа өй-шаанда ону ап четтикпээн кижилерге, а ооң иштинде Ада-чурттуң Улуг дайынының хоочуннарынга тыпсыр.

Россия Федерациязының Маадыры ат-биле шаңнаткан хамаатыга онза шылгаралдың демдектерин – “Алдын Сылдыс” медальды база хүндүлүг атты тывысканының дугайында хүндүлүг бижикти тыпсыр.

“Алдын Сылдыс“ медаль мурнуку талазында ийи кырлыг кылаң херелдерлиг беш-адыр сылдыс болур. Херелдиң узуну – 15 миллиметр. Медальдың артыкы талазының ортузунда үндүрүк үжүктер-биле “Россияның Маадыры” деп бижик бар (үжүктерниң хемчээли 4х2 миллиметр). Үстүкү херелде – медальдың дугаары, ооң бедии бир миллиметр. Медальды алдындан кылган болур, деңзизи 21,5 грамм.

Ол бедии 15 миллиметр база калбаа 19,5 миллиметр алдын-биле чайырлаан дөрт-булуңчук демир колодка-биле коштунган болгаш үстүкү база адаккы кезектеринде хооларлыг болур. Колодкаларны дургаар чириктер бар, ооң иштики талазын Россия Федерацияның Күрүне тугунуң өңү-биле өңнеш үш өңнуг муар пөс-биле додарлаан. Колодканың аар ийинде медальды хепке кыстырар ээриилдиг өргенчигеш бар.

“Алдын Сылдыс” медальды хөректиң солагай талазынга, орден болгаш медальдарның кырынга эдилээр.

Россия Федерациязының Маадырлары хоойлужудулга-биле доктааткан чиигелделерлиг болур.