Каа-Хем кожууннуң чедери берге болгаш кайгамчык чараш чери – Үжеп-Аксы сумузунда мал чеминиң белеткели доозулганын чагырга чери дыңнаткан.
Сумуда 54 өреге бүрүзү хууда дузалал ажыл-агыйлыг. Оларның бир чамдыызы ногаа тарып, өскелери мал-маган тудуп турар.
Каа-Хем кожууннуң кол зоотехниги А.М. Ховалыг Сизим, Эржей, Бельбей болгаш Үжеп-Аксы сумуларынга четкен.
Тывада мал чеминиң белеткелиниң талазы-биле оперативтиг штаб ажылын эгелээнин сагындыраал. Эрткен кыш чер болгаш мал ажылдыгларга амыр эвес болганы-биле суму бүрүзүнде сиген кезер бригадаларны тургускан. Кожуун бүрүзү сиген курлавырын харыылаар ужурлуг.