Читкен кижилерни дилеп турар

    0
    15

    Эрткен хонуктарда чиде берген ийи кижини дилеп турарын Тывада Онза байдалдар яамызының Кол эргелели дыңнаткан.

    Март 13-те 20 харлыг аныяк оол Бии-Хем кожууннуң Аржаан суурдан Кызыл кожууннуң Ильинка суурже тайгалап аъттыг үнүпкен. Ол орукка аза бергенин, Бии-Хем кожуунну Ильинка суурну эрте бергениниң дугайында бодунуң телефонундан долгааш, дыңнаткан.

    Тываның дилеп-тывар камгалалының дөрт бөлүү читкен кижини дилеп турар. Дилээшкин ажылдарынга Кызыл биле Бии-Хем кожууннарның чурттакчылары каттышкан. Ийи хүн дургузунда 235 километр черни көрген, дилээшкин ам-даа уламчылап турар.

    Март 14-те Таңды кожуунда 16 харлыг оолдуң тывылбайн турарының дугайында дыңнаткан. Бай-Хаак суурга 16 харлыг школачы оол өөренип чорткаш, хондур келбейн барган.

    Россияның Тыва Республика талазы-биле иштики херектер яамызының, өрт кезээниң болгаш школаның ажылдакчылары чиде берген оолду дилеп турар.

    Тываның Баштыңы Шолбан Кара-оол дилээшкин ажылдары канчаар чоруп турарын ийи шак болгаш-ла дыңнадып турарын албан черлериниң удуртукчуларынга чагаан.

    #Аппаратхуралы #Шолбанкара_оол #ОБЯ #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews

    Реклама