Чогаалчылар чыыжы

    0
    3

    Дүүн, март 3-те, Чогаалчыларның бүгү делегей хүнүн ресубликаның чогаалчылары болгаш чечен чогаалга сонуургалдыглар Тыва Үндезин культура төвүнге байырлыг хурал-биле демдеглээн.

    Республиканың кол улуг ном саңы Александр Пушкин аттыг библиотеканың ажылдакчылары “Бүгү делегейде чогаалчылар хүнү” деп номнар делгелгезин байырлыг хуралдың киржикчилеринге бараалгаткан. Тываның чогаалчыларының номнарының чараш болгаш утка-шынарлыг делгелгезин олар аажок сонуургап көрген.

    ТР-ниң Дээди Хуралының даргазының оралакчызы Ирина Бадыргы Чогаалчыларның бүгү делегей хүнү-биле холбаштыр чогаалчыларга, чечен чогаалга хандыкшылдыгларга болгаш сонуургалдыгларга байыр чедирип, чогаадыкчы чедиишкиннерни күзээн.

    Чогаалчыларның бүгү делегей хүнү-биле байырны республиканың чогаалчыларынга Тываның чогаалчылар эвилелиниң баштаар чериниң даргазы Сайлыкмаа Комбу чедирип, чогаадыкчы олча-омактыг болурун күзээн.

    Тываның чогаалчыларының байырлыг хуралының киржикчилеринге хөгжүмнүг байыр сөңнеп, Алексей Чыргал-оол аттыг уран чүүл колледжиниң музыка башкызы Томас Моңгушка удурткан ыраажылар бөлүү, Тываның улустуң хөөмейжизи Андрей Моңгуш, Тываның Виктор Көк-оол аттыг национал хөгжүм-шии театрының артистери тыва чогаалчыларның шүлүктеринге бижээн ырларны бараалгаткан.

    Кызылдың 9 дугаар школа-гимназияның өөреникчилериниң болгаш башкыларының чогаалчыларга ыры-шоорлуг, кожамыктарлыг, дүрген чугааларлыг байыр чедириишкини онзагай болган.
    Хоочун болгаш чогаадыкчы ажылга чедиишкинниг чогаалчыларга Тываның баштаар чериниң хүндүлел бижиктерин болгаш белектерни тывыскан.

    Реклама