Чылдың башкызы – Екатерина Китайкина

    0
    11

    Апрель 5-те эгелээн Тываның башкыларының профессионал мергежилдииниң 2021 чылда мөөрейлери эрткен неделяның төнчүзүнде доозулган. Республиканың школа назыны четпээн уругларның болгаш ниити билиг өөредилге албан черлеринден ниитизи-биле 251 башкылар болгаш удуртукчулар профессионал мергежилдииниң мөөрейлеринге киришкен.

    Регион мөөрейлериниң киржикчилери башкылар боттарының билиг-мергежилдиин болгаш чогаадыкчы чоруктуун кичээлдерге, мастер-класстарга, класс шактарынга 5 хүн дургузунда көргүзүп бадыткаан.

    Өөредилге албан черлериниң удуртукчулары амгы үениң өөредилге албан черлериниң төлевилелдерин бо мөөрейлерге камгалаан.

    Кызыл хоорайның № 11 школазының орус дыл болгаш литература башкызы Екатерина Китайкина мөөрейге шылгарааш, «Тыва Республиканың чылдың башкызы — 2021» атка төлептиг болган.

    «Тыва Республиканың өөредилге организациязының чылдың удуртукчузу — 2021» — Кызыл хоорайның № 5 гимназияның директору Марина Горбунова.

    «Тыва Республиканың чылдың баштакчы болгаш дагдыныкчы эр башкызы — 2021» — Кызылдың № 2 школазының амыдыралдың айыыл чогунуң үндезинннериниң башкызы Александр Сүрүнчап.

    «Тыва Республиканың чылдың психолог башкызы — 2021» — Кызылдың № 15 лицейниң психолог башкызы Айсуу Полум.

    «Тыва Республиканың чылдың тускай эртемнер башкызы — 2021» — Тываның политехниктиг техникумунуң тускай эртемнер башкызы Хертек Айдыс.

    «Тыва Республиканың чылдың мастери — 2021» — Тываның политехниктиг техникумунуң Чеди-Хөл кожууннуң Хову-Аксы суурда салбырының бүдүрүлге өөредилгезиниң мастери Сайлык Чыртакпан.

    «Төрээн дылга, орус дылга база Бүгү-российжи мастер-класс — 2021» шаңналга Кызыл кожууннуң Черби школазының орус дыл болгаш литература башкызы Сандый Шеңне төлептиг болган.

    «Тыва Республиканың чылдың кижизидикчи башкызы — 2021» — Кызылдың № 15 «Страна детства» бичии уруглар садының логопед башкызы Светлана Петрова.

    Республиканың өөредилге болгаш эртем сайыды Солангы Тамчай база өске-даа удуртукчу ажылдакчылар профессионал мергежилдииниң регион мөөрейиниң тиилекчилеринге болгаш лауреаттарынга шаңналдарны байырлыг байдалга тыпсып, башкы ажылынга чогаадыкчы чедиишкиннерни күзээннер.

    Реклама