Хоккей шөлү – кадыкшылдың девискээри

    0
    0

    Тываның Аныяк эмчилериниң чөвүлели кожууннарда ийи хоккей шөлүн кылып берген.

    Тываның Баштыңы Шолбан Кара-Оол аппарат хуралынга аныяк эмчилерниң эгелекчи саналын онзалап демдеглээн. Олар республиканың Кадык камгалал яамызының грантызын алгаш, ооң акша-хөреңгизи-биле Чадаана хоорайга хоккей шөлүн тудуп берген.

    Грант мөөрейин «Демография» нацтөлевиледиң «Ниитилелдиң кадыкшылын дадыктырары» регионалды төлевилелдиң кызыгаары-биле эрттирген. Хоккей шөлүн боттуу-биле ажыглаар кылдыр кожуун чагыргазынга дамчыдып берген.

    А Туран хоорайга кылган хоккей шөлүнүң байырлыг ажыдыышкыны эрткен дыштаныр хүннерде болган.

    Спорт объектизин тус черниң эрге-чагыргазынга дамчыдып берген.
    Аныяк эмчилер чөвүлели республикада нарын айтырыгларны шиитпирлээр сорулга-биле Россияның Президентизиниң грантылар фондузунуң мөөрейлеринде база киржип турар.

    2019 чылда ук чөвүлел «Хостуг тынаалыңар» деп төлевилели-биле Россияның Президентизиниң грантылар фондузунуң деткимчезин алгаш, бүдүн чыл дургузунда Чаа-Хөл кожуунга туберкулез аарыы өөскээн чер бүрүзүнге дезинфекцияны кылган.

    2020 чылда короновирус хамчыы өөскээн чер бүрүзүнге болгаш Кызылдың агаар база пассажирлер транспорттарынга, өске-даа объектилерге дезинфекцияны чоруткан.

    Реклама