Инек чылының бир дугаар хүнүнде шаңналдар

    0
    0

    Бөгүн Тываның Чазак Бажыңынга Шагаа байырлалын таварыштыр ажыл-ижинге шылгараан ишчилерге күрүне шаңналдарын байырлыг байдалга тывысканын @tmgnews17 дыңнадып тур.

    Тываның Баштыңы Шолбан Кара-оол чаңгыс чер-чурттугларынга Шагаа-биле байыр чедиргеш, күрүне шаңналдарын ажыл-ижинге шылгараан, эң-не төлептиг кижилерге тывыскан.

    «Россия Федерациязының алдарлыг журнализи» деп бедик атты уруглар чогаалчызы Александр Шоюнга тывыскан. Хүндүлүг хоочун журналист чуртталгазының хөй чылдарын уруглар болгаш элээдилер чогаадылгазынга тураскааткан. Ол «Сылдысчыгаш» солуннуң база «Алдын кушкаш» сеткүүлдүң арыннарында уругларга тыва чоннуң мерген угаанын, езу-чаңчылдарын таныштырып турар.

    «Тыва Республиканың алдарлыг хамаатызы» атты эрткен чылын аравыстан чораан Джамбел Лодой Башкыга мөчээниниң соонда тывыскан. Хүндүлүг Башкының шаңналын өөнүң иштинге дамчыткан.

    Буддийжи философия доктору, «Ламрим» буддийжи шажын хөй-ниити организациязының даргазы Геше Лобсанг Тхуптен Тыва республиканың орденинге төлептиг болган. Ол Тывада 25 чыл ажыг чурттап, муң-муң россияннарга, ылаңгыя Тываның чурттакчыларынга деткимчезин көргүзүп чоруур лама башкы.

    «Тыва республиканың уран чүүлүнүң алдарлыг ажылдакчызы» деп хүндүткелдиг атты «Он-Кум» мода болгаш костюм театрының удуртукчузу, хөй-ле делегей болгаш российжи мөөрейлериниң лауреады Андрей Неверицкий алган. Чүгле Тывада эвес, республикадан дашкаар хөмден кылган онзагай ажылдары-биле сурагжаан мастер Сайдаш Момбужайга «Тываның Улустуң мастери» деп атты тывыскан.

    Ол ышкаш коронавирус хамчыы-биле демисел чорудуп турган медицина ажылдакчыларынга Россияның Президентизиниң шаңналдарын тывыскан. Россияның президентизиниң Өөрүп четтириишкин бижиин республиканың дүрген дуза чедирер төвүнүң эмчизи Вячеслав Данжаловка, Республиканың № 1 эмнелгезиниң терапевт эмчизи Чодураа Мандаржапка тывыскан. Россияның президентизиниң Хүндүлел бижиктерин Республиканың халдавырлыг аарыглар эмнелгезиниң улуг эмчи сестразы Өлзеймаа Баажай, Республиканың № 1 эмнелгезиниң кардиология салбырының улуг эмчи сестразы Мөнгүнмаа Ооржак база Республиканың № 1 эмнелгезиниң лаборатория албанының эргелекчизи Оксана Ооржак алган.

    «Тыва республиканың кадык камгалалының алдарлыг ажылдакчызы» деп хүндүлүг атты ТР-де Росхереглелхайгаарал эргелелиниң салбыр начальниги Аляна Дажикайга тывыскан.

    Мөңгүн-Тайгада «Малчын» ажыл-агыйының склад эргелекчизи Нина Донгак «Тыва Республиканың көдээ ажыл-агыйының алдарлыг ажылдакчызы» деп атка төлептиг болган.

    Тыва Республиканың көдээ ажыл-агый база спорт адырының шылгараңгай ажылдакчыларынга база күрүне шаналдарын тывыскан.

    Чуруктарны Виталий Шайфулин тырттырган.

    Реклама