Интернационалчы дайынчыларны сактып, мөгейген

    0
    0

    Тываның Баштыңы Шолбан Кара-Оол бөгүнгү аппарат хуралынга өзүп олурар салгалдарның ада-чуртчу кижизидилгезинче кичээгейни угладырган.

    Россияның Президентизи: «Патриотизм темазы – бистиң идеологиявыстың өзээ-дир» – деп чугула сөстерни чугаалаан дээрзин ол демдеглээн.

    Афганистандан дайынчыларны үндүргениниң ээлчеглиг чылынга тураскаткан хемчеглер бөгүн бүгү Тывага эрткен.

    Тываның найысылалы Кызылда Тиилелге шөлүнде «Тываның оолдарынга: локалдыг дайыннарда база дайынчы чөрүлдээлерде дириг арткан болгаш чок болганнарга» деп бижээн БТР тураскаалдың чанынга афган дайынының хоочуннары, чазак болгаш парламентиниң, хоорай чагыргазының, хөй-ниити организацияларының төлээлери, школачылар болгаш студентилер чыглып келген.

    Дайынчы хөделиишкиннерниң киржикчилеринге оларның эрес-дидим чоруу дээш өөрүп четтиргенин илередип, мөчээннерге минутаның сактыышкынын чарлаан.

    Тывадан афган дайынынга 462 солдат киришкен. Дайынчы хөделиишкиннер хоочуннарының саналы-биле, Интернационалчы дайынчылар аттыг Кызылдың 12 дугаар школазының херим иштинде, «Шериг болгаш албан хүлээлгезин күүседип тура мөчээн Тываның оолдарынга» тураскаалды тургускан: иезиниң чылыг-чымчак холдарындан оолдары куштар болуп төрээн черинден ужуп бар чоруурлар. Тураскаал афган дайынга мөчээн 12 оолдарга мөгейигни илереткен.

    Митинг төнчүзүнде тураскаалга боодал чечектерни болгаш гвоздикаларны салган.

    # #Шолбанкара_оол #Ада_чуртчукижизидилгези #Афгандайыны #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews

    Реклама