Кожууннарда «Кыштаг» киржикчилерин шилээн

    0
    0

    Тываның Баштыңы Шолбан Кара-оолдуң эгелээшкини-биле 2015 чылдан бээр республикага чедиишкинниг боттандырып келген “Аныяк өг-бүлеге – кыштаг” губернатор төлевилел чурттакчы чоннуң улуг деткиишкинин алган. Аңаа киржиксээр кижилерниң саны көвүдээни-биле бо губернатор төлевилелиниң хемчээли дыка алгаан.

    Төлевилелге киржир күзелдиг кижилерниң хар-назынын дыка кызыгаарлавас сорулга-биле ону “Кыштаг” деп эде адааш, 55 хар чедир назы-харлыг кижилер киржирин база чөпшээрээн.

    Чаңгыс чер-чурттугларының идегелин чаалап алган, өг-бүлезиниң ээлериниң бирээзи ажыл чок деп хоойлу ёзугаар санаттынар, чонну ажыл-биле хандырар төптүң бүрүткелинде турар, 36 хардан 55 хар назылыг кижилер шилилгеде киржип турар. Республиканың 17 муниципалдыг тургузугларынга чоннуң чыыштары эрттип, төлевилелге киржир кылдыр 84 өг-бүлени деткээн.

    “Кыштаг” губернатор төлевилелиниң 2021 чылда киржикчилериниң 80 хуузу тус черниң чурттакчы чоннуң деткиишкинин алганын Көдээ ажыл-агый яамызы дыңнаткан. Чоннуң деткиишкин алган 84 киржикчизиниң 8-зи 36-дан 55 хар назылыг. Оларның аразындан 76 киржикчи аныяк өг-бүлелер. Чөөн-Хемчик кожууннуң Ийме, Хөндергей, Чыргакы сумулардан шилилгеге киржикчилер хөй болган.

    Чаңгыс чер-чурттугларының деткимчезин алган өг-бүлелерниң документилери-биле ажылдаары, оларны арат ажыл-агыйлыг кылдыр бүрүткээри, мал болгаш черни тускайлап бээри дээш өске-даа нарын ажылдар удавас эгелээр.

    #Кыштаг #Губернатортөлевилели #Кожууннар #Көдээажыл_агый #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews

    Реклама