Мөңгүн медальды чаалап алган

    0
    7

    Тываның мөгези Начын Монгуш Россияның эң шыырак арзылаңнар аразындан түңнел хүрешке үнүп келгеш, делегейниң эң тергиин мөгези Завур Угуевке үжүүрлешкеш, мөңгүн медальды чаалап алган.

    Март 11-14 хүннеринде Улан-Удэ хоорайда хостуг хүрешке Россия чемпионады эртип турар. Тываның Баштыңы Шолбан Кара-Оол Бурятияның Баштыңы Алексей Цыденовтуң чалалгазы-биле Россияның хостуг хүрешке чемпионадынга келген.

    Тываның чыынды командазында 11 мөге ында киржип турар. Россияның спорт мастерлери Хүреш-оол Дондук-оол, Начын Монгуш, Амир Чамзын, Кежик Седен, Белек-оол Күжүгет, Омак Сюрюн, Кежик Монгуш, Эзир Тюлюш, Чаяан Монгуш, спорт мастеринге кандидат Денис Седивес, делегей чергелиг класстың Россияның спорт мастери Сайын Казырык олар чыынды командада.

    Тыва мөгелер 57 кил чедир деңзиге чараш болгаш “изиг” оюннарны көргүскен. 2021 чылдың Россия чемпионадының бирги хүнүнде чартык финал оюннарже ол деңзиде Начын Монгуш биле Белек-оол Күжүгет эрткен.

    Тываның Баштыңы Шолбан Кара-оол тыва мөгелер дээш “аарып” турар. Токиога эртер олимпиадаже тыва спортчулар чоруур апарза, оларны албан деткиирин медеглээн.

    – Маргылдааның бирги хүнү чедиишкинниг болду. Эң шыырак сес мөгениң санында Тыва Республикадан 4 спортчу кирген! – деп, Тываның Баштыңы өөрүнчүг медээни дыңнаткан.

    Реклама