Школаларга чаа номнар

    0
    2
    Тываның школаларынга 15 тонн деңзилиг, 42000 кезек чаа өөредилге номнары чедип келгенин Өөредилге яамызы дыңнаткан.

    Россияның өөредилге номнарының «Чырыдыышкын» парлалга чери республиканың чагыы-биле чорудуп берген. Эрткен күзүн школачыларга чедишпейн турар өөредилге номнарының даңзызын школаларның библиотекарьлары-биле кады тургускаш, республика бюджединиң акша-хөреңгизи-биле чагыткан.

    Даштыкы дыл, орус дыл, математика, история, информатика, обществознание, чогаал номчулгазы эртемнериниң номнары чедишпейн турары сайгарылгадан билдинген.

    Чаа номнарны 17 өөредилге организацияларынга хувааштыр үлеп берген. Кызылдың 5 дугаар гимназиязы – 5186, 9 дугаар гимназия – 3580, үш дугаар школа – 4170, бир дугаар школа 3568 кезек номну чагыдып каан болганда, хоорайның школаларынга 36000 номну берген.

    Арткан номнарны Кызыл кожууннуң Каа-Хем биле Сукпак суурларның школалары, Бии-Хемниң Сесерлик ортумак школазынче чоруткан. Өөреникчилер чаа билиглерни чаа номнардан өөренир.

    #Өөредилгеяамызы #Чааномнар #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
     
    Реклама