Тос кожуун эмчи дузазының автомашиналарын алган

    0
    0

    Республиканың көдээ черлеринде бирги эмчи дузазын чедирип турар эмнелге организациялары база кожууннарның төп эмнелге черлериниң улуг эмчилери “LADA GRANTA 219010” биле “LADA 213100” маркалыг автомашиналарның дүлгүүрлерин дүүн алгаш, далаш-биле суурларынче аъттаныпканын @tmgnews17 дыңнадып тур.

    Чурттакчы чонга эргежок чугула эмчи дузазын чедирип турар эмнелге албан черлерин транспорт аймаа-биле хандырар дээн Россияның Президентизи В. Путинниң даалгазы-биле, Россия Федерациязының Чазааның 2019 чылдың октябрь 19-та “Россия Федерациязының кадык камгалалының бирги звенозун чаартыры база кадык камгалалының бирги звенозун чаартыр регион программаларының төлевилелдеринге экспертиза эрттирериниң, кадык камгалалының бирги звенозун чаартыр регион программаларын мониторингилээр база контрольтаар чурумну бадылаар дугайында” №1304 доктаалы езугаар, “2021-2015 чылдарда кадык камгалалының бирги звенозун чаартыры” программа күүселдези-биле, 2021 чылдың башкы айында, Тыва Республиканың эмнелге албан черлеринге 9 санныг автомашиналарны 19423,8 муң рубль акша-биле садып эккелгеш, дүлгүүрлерин хүлээткен. Ол машиналарның 6-зын аарыг кижилер дажыглаарынче, 2-зин ыраккы кожууннарже биологтуг материалдар чедиреринге, а бирээзин эмчи ажылдакчыларын аарыг кижилерже чедиреринге ажыглаар кылдыр хувааган.

    Каа-Хем, Чөөн-Хемчик, Кызыл кожуун, Бии-Хем кожуун эмнелгелериниң улуг эмчилери “Lada Granta” автомашиналарның дүлгүүрлерин өөрүшкү-биле хүлээп алган. А «ВАЗ 2131» машиналар Бай-Тайга, Эрзин, Барыын-Хемчик, Улуг-Хем, Тес-Хем кожууннарның чурттакчы чонунга эмчи дузазын чедирери-биле бадыпкан.

    Эрзин кожууннуң төп эмнелгезиниң кол эмчизиниң хүлээлгезин күүседип турар Оолак Ооржак өөрүшкүзүн үлешкен: “Хамчык аарыы нептерээн хайымныг бо үеде, бистиң эмчи ажылдакчыларывыска чугула херек автомашинаны алганывыс дээш дыка өөрүп тур бис. Эмнелге албан черлериниң материал-техниктиг баазазын быжыглап, деткиир дээн күрүне программаларының ачызында бо чоокта алган ийи дугаар автомашинавыс-тыр. Тываның Чазааның база республиканың кадык камгалал яамызының Программалар күүселдезин чедип алыр дээш кылып чорудуп турар ажылын үнелеп, ылаңгыя Тываның Баштыңы Шолбан Кара-оолга улуу-биле өөрүп четтиргенивисти илередип тур бис”.

    Республиканың дүрген эмчи дуза албан черлеринде 122 санныг автомобильдер барын сагындыраал. Оларның 84-ү төп кожуун эмнелгелеринде, а 68-зи – республиканың дүрген эмчи дуза төвүнде. Тыва Республика федералдыг программалар боттанылгазында 2016 чылдан бээр идепкейлиг киржип, эмчи дузазын үе шаанда дүрген чедиреринге чугула херек автомашиналарны ап турар.

    #Тывачазак #Медицина #Чааавтомашиналар #Программа #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews

    Реклама