Тыва – бистиң өргээвис

    0
    9
    Тыва Арат Республиканың 100 чылынга тураскааткан “Тыва – бистиң өргээвис” деп республика фестивалының сумулар чадазы Чөөн-Хемчик кожуунда доозулган. Аңаа 11 чогаадыкчы коллективтер киришкен.

    Фестивальдың кожуун чадазынга белеткел эгелээн. Тус черлерде чогаадыкчы коллективтерниң кожуун чадазынга киржилгезинге улуг деткимчени суму чагыргалары, хөй-ниити организацияларның идепкейжи кежигүннери чедирип турар.

    “Тыва – бистиң өргээвис” фестивальдың шугуму-биле “Мээң төрел аймаам – мээң чоргааралым” деп республика чергелиг төлевилелди боттандырарының хемчеглериниң талазы-биле чөвүлел хуралды Тываның күш-ажыл болгаш социал политика сайыды Сайдаш Моңгуш Чөөн-Хемчик кожууннуң төвү Чадаана хоорайга эрттирген.

    Тываның Хөй-ниити палатазының кежигүнү Долаана Доскаар “Төрел аймактарның чаагай чаңчылдарын эгидер талазы-биле хөй-ниити ажылы” деп илеткелди чөвүлел хуралга номчаан. Ооң соонда “Мээң төрел аймаам – мээң чоргааралым” деп республика чергелиг төлевилелди боттандырарының хемчеглериниң дугайында чугаалашкан. Бо төлевилелди канчаар боттандырарынга хамаарыштыр боттарының бодалдары-биле хуралдың киржикчилери аразында солушкан.

    “Тыва – бистиң өргээвис” фестиваль республиканың культурлуг болгаш хөй-ниити амыдыралының төөгүзүнде көскү болуушкун. Ол эң баштай 1996 чылда, Тыва Арат Республиканың 75 чылында болуп эрткен. Ооң онзагай талазы – хөй киржикчилерлии болгаш жанрларның бүгү хевирлериниң фестивальга таарымчалыы.

    Тываның Баштыңы Шолбан Кара-оол 2018 чылды Биче суурларның хөгжүлдезиниң чылы кылдыр чарлаптарга, ынчан республиканың культура ажылдакчылары “Тыва – бистиң өргээвис” фестивальды чорудуп, “Чогаадыкчы чоруктуң эгези – суурларда” төлевилелди боттандырган.

    “Тыва – бистиң өргээвис” фестиваль Тыва Арат Республиканың 100 чылында бир янзы уткалыг болуп, тыва улустуң мөзү-шынарын төрел аймактарның чаагай чаңчылдарынга үндезилеп кижизидеринге салдарлыг болур “Мээң төрел аймаам – мээң чоргааралым” республика чергелиг төлевилелдиң боттаныышкыны эгелээн.
    Реклама