Тыва поэзияның дээжизи

    0
    2

    Чаяна Чыкай, Тываның Чогаалчылар эвилелиниң кежигүнү.

    Тыва кызы даңгына

    Алдын сайлыг эриктерниң
    Агым чалгыын сүзүп ойнаан
    Авазындан чаяан олчаан
    Ак сүт ышкаш арыг-чаагай —
    Тыва кызы даңгына!

    Чечек шыпкан аяңнарның
    Челээштерин хойлап алган
    Сеткил-хѳңнү эртине дег
    Сергек-омак, уян, чымчак —
    Тыва кызы даңгына!

    Чонун, ѳѳрүн алдаржыткан
    Чойган сынныг, чазык чаңныг
    Чараш-каазын магадаткан
    Чаяалганың дээжизи —
    Тыва кызы даңгына!

    Мѳңгүн меңги сыргаларлыг
    Алдын холдуг, аржаан сѳстүг
    Мѳге оолду алгап-йѳрээр
    Ажай Таңды чоргаар ээзи —
    Тыва кызы даңгына!

    Дүнеки аялга

    Чеңи-биле хүннү дуглааш
    Чеди-Хаанны дээрге дискеш
    Оран-чуртка дышты сөңнеп,
    Октаргайдан дүн-даа дүштү.
    Долбанналган чаактарлыг
    Тодуг ай-даа хүлүмзүрдү:
    Долгандыр бо өртемчейге
    Тоолун ыдып эгеледи.
    Тааланчыг ыржым өттүр
    Талдар хаттан шылырай-дыр,
    Авам мени өпейлээнзиг
    Аялгалар дыңналы-дыр…
    Сагыш-хөңнү чаңгыс болган
    Чалыыларның ырызы-даа,
    Чаштың чассаан алгызы-даа
    Сагыжымны чылыктырды…
    Хүннүг турда, сагыш долган
    Күзелдерим хүлүүн чежип,
    Дүнге таалап, куюмналып
    Дүвүрел чок ужуп үндү.

    Реклама