Тывага август 17-ден 20-ге чедир болуп эртер IV делегей чергелиг сарыг шажын шуулганының киржикчилери болгаш аалчылары Чаа-Хөлде Сүме дааның хаязында сиилбип кылган Авыда бурганның чаа овур-хевирин көрүп, аалдап чедер.
«Бурган-Даа» шажын объектизи – шуулганның шупту киржикчилеринге сорунзаның төп чери апаар.
Чаа-Хөл кожуун чагыргазы онза тураскаалдыг черни сонуургап кээр аалчыларга бүгү талалыг эптиг байдалдарны тургузуп, айыыл чок чорукту хандырарынче улуг кичээнгейни угландырып турар.
Сат Шулуу аттыг Чаа-Хөл ортумак школазының 1992 чылдың доозукчулары Сүме дааның девискээринге тургузар дыштанып олурар сандайларны белек кылдыр дамчытканын чагырга чери дыңнаткан.
Чаа-Хөл ортумак школазын аңгы-аңгы чылдарда доосканнар чаңгыс эвес удаа бир демин көргүзүп турар.
Шуулган Сибирь федералдыг округка чылдың кол болуушкуннарының бирээзи болур.
