Алдан-Маадырлар тура халыышкынының 143 чылынга тураскааткан байырлал

2024 чылдан эгелеп Чөөн-Хемчик кожууннуң Сүме шөлүнге Алдан-Маадыр өгбелерниң хосталга шимчээшкининге маадырлыг чоруун сактып демдеглээр хүннү, Тыва Арат Республика үезинде Даа кожуунга бактаап кирип турган кожууннар демдеглеп эрттирери чаагай чанчыл болгаш чараш байырлал болу берген.

Бо удаада Алдан-Маадырлар тура халыышкынының 143 чылынга тураскааткан байырлыг хемчеглерни Өвүр кожууну эрттирген.

Байырлалдың чыскаалынга Алдан-Маадырларның салгалдары, кожууннарның төлээлери киришкенин кожууннуң чагырга даргазы [id729424688|Айдыс Куулар] дыңнаткан.

Эр кижиниң үш оюнну – ча адар маргылдааның баг адар хевири, ийи харлыг аъттар аразынга чарыш, 18 харлыг оолдар аразынга хүреш болган. Оон ангыда өг тигер, чурук мөөрейи, Алдан-маадыр аттыг национал музейниң болгаш кожууннуң төп ном саңының делгелгези болган.

Кожууннар оюн-тоглаага, спортчу маргылдааларга, мөөрейлерге идекпейлиг киришкеннер.

Театржыткан оюн-көргүзүге болгаш мөөрейлерге хөй санныг сан алгаш, 1-ги черни Чаа-Хөл кожуун алган, шаңналы – 100000 рубль.

Аът чарыжынга 1-ги черде Иймеден Чечен-оол Ондар (богба болгаш 15000 рубль).

18 харлыг мөгелерниң хүрежинге 40 ажыг мөге хүрешкен. Агаар бойдустуң хады, чаъзын-даа тоовайн ачыр-дачыр тудушканының түңнелинде, Чөөн-Хемчиктен Айдыс Куулар шүглүп үнгеш, богба-биле шаңнаткан.

Ча адар маргылдааның баг адар хевиринге 108 багжы киришкен. 1-ги черде Чадаң-Кат Ооржак (богба, акша).

Тываның Баштыңы [id360104045|Владислав Ховалыгның] чарлыы-биле, майның 11-ни Алдан-Маадырларның маадырлыг чоруунга сактыышкын хүнү кылдыр тургусканын сагындыраал.