Тывага 2026 чылда өөредилге инфратургузуун эде чаартырының улуг хемчээлдиг программазы уламчылаар. Тываның Баштыңы Владислав Ховалыгның дорт дамчыдылга үезинде дыңнатканы езугаар, чаартылга чүгле ниити өөредилге школаларынга эвес, а школа назыны четпээн болгаш ортумак профессионал өөредилге албан черлеринге база хамааржыр. Чаартылгага ниитизи-биле чеди объектини хаара тудар.
Чижээ, Ак-Довурактың 3 дугаар школазынга үндезин септелге ажылдарын чорудар. Ажылды «Аныяктар болгаш уруглар» национал төлевилелдиң «Уругларга бүгү-ле экини» федералдыг төлевилел езугаар планнаан. 1983 чылдың августа ажыттынган дөрт каът школага кажан-даа улуг септелге болбаан. Амгы үеде школада 700 хире өөреникчи өөренип турар.
«Өг-бүлеге деткимче» федералдыг төлевилел-биле Барыын-Хемчик кожууннуң Кызыл-Мажалык суурда «Чечек» уруглар садынга база Чеди-Хөл кожууннуң Ак-Тал суурда уруглар садынга үндезин септелгелер планнаттынган.
Уруглар садтарынга үндезин септелге программазын боттандырары – Президент Владимир Путинниң эгелээшкини-биле эгелээн «Өг-бүле» деп чаа национал төлевилелдиң бир кезээ болур. Ыда уруглар садтары база колледжтер кирген. Ол программа шугуму-биле Тывада чаарттынган бир дугаар өөредилге чери Мөңгүн-Тайга кожууннуң Мугур-Аксы суурда «Чечек» уруглар сады болган.
«Профессионалитет» федералдыг төлевилел шугуму-биле Тываның агроүлетпүр техникумунуң 2 дугаар ниити чуртталга бажыңын, ол ышкаш Ак-Довурактың даг техникумунуң лабораториялар болгаш мастерскаялар бажыңнарын эде чаартыр.
Оон аңгыда Улуг-Хем кожуунда «Чодураа» база Тес-Хем кожуунда «Сайлык» стационар лагерьлерге улуг септелге ажылдарын планнаан. Ол объектилер федералдыг мөөрейге чедиишкинниг киржип, «Уруглар болгаш аныяктарның өөренир, дыштаныр болгаш кадыкшылынын быжыглаарынга байдалдарны тургузары» федералдыг төлевилелдиң чаартылга программазынче кирген.
«Чодураа» лагеринге 60-60 оруннуг ийи чаа корпусту тудар болза, «Сайлык» лагериниң чемненир черин болгаш эмнелге пунктузун септеп чаартыр. Ак-Довурак хоорайның өөредилге эргелелинге хамааржыр «Таежный» уруглар лагеринге эрткен чылын улуг септелгени кылып, чемненир чер биле эмчи пунктузун бүрүнү-биле чаартканын сагындыраал.
Тыва 2022 чылдан бээр национал төлевилелдерге киришкениниң түңнелинде, 50 ажыг школага үндезин септелгелерни чорудуп, эде чаарткан.
Эрткен чылын «Аныяктар болгаш уруглар» национал төлевилели-биле Хову-Аксы, Терлиг-Хая, Бора-Тайга, Чыргаланды, Сукпак, Аксы-Барлык, Кызыл-Даг суурларда ниити өөредилгениң чеди албан черин долузу-биле чаарткан. Владислав Ховалыг РФ-тиң өөредилге сайыдының оралакчызы Андрей Николаев-биле чоокта чаа болган ужуражылгазында ооң дугайында дыңнаткан.
2030 чылга чедир республиканың 13 школазын үндезин септелге ажылдарынче хаара тудар.