Арыскан суурнуң эки турачылары Тиилелге хүнүнге уткуштур ачы-дуза акциязында кидин түлүк белеткенип турарын чагырга чери дыңнаткан.
Суурнуң аът федерациязының кежигүннериниң дамчыткан дузаламчызы – 23 муң рубль-биле тускай шериг операциязында киржип турар дайынчыларга чажыртынып шыптынар четкилер кылыр материалдарны саткан.
Энерел сеткилдиг чоннуң чыып берген беш муң акшазы-биле демир хайындырар херекселди, 10х10 хемчээлдиг дөрбелчин хоорзаларны садып алган. Ол ышкаш, суму чагыргазының ажылдакчызы Аржаана Ооржак демир суугулар каңнаар аппаратты саткаш, дамчыткан.
Сумунуң херээжен чон чажыртынып шыптынар четкилерни, камгалал билектээштерни кылып, каска иштинге кедер бөрттерни аргып турар.
Ус-шевер Радик Сарыг-оол, Азият Мунзук, Василий Санчай-оол дайынчыларга бодунга ап чоруурда эптиг, чиик, ийи хире кил деңзилиг болгаш үш кил деңзилиг шору улуг суугуларны кылырын уламчылавышаан. Ооң мурнунда сес бичежек суугуну Улусчу фронтунуң регионалдыг салбырынга дужааган турган.
Арысканның суму чагыргазының даргазы Ш.Ч. Донгак Кызылдан ажыглап каапкан ишти куруг баллоннарны тып, шак мындыг суугуларны чогаадып кылып ап болурун эр улус-биле сүмележип тургаш, чогаадып кылганнары бо. Суугуга отту салыптарга, пашка суг 2-3 минута болгаш хайны бээрин база шенеп көргеннер.
Дайынчыларга ачы-дуза чедирер акция апрель 29-ка чедир уламчылаарын сагындыраал.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы). Харылзажыр телефону: +7 (39422) 2-10-50.
