Бии-Хем кожууннуң Аржаан – Хадын суурларже кирер оруктарда үндезин септелге ажылдары доостур чадазында чоруттунуп турарын Аржаан суму чагыргазының даргазы Екатерина Тулуш дыңнаткан.
Улуг хемчээлдиг тудуг ажылдарын «Восток» кызыгаарлаан харыысалгалыг ниитилелдиң орукчулары чорудуп турар.
Автоорук республиканың турисчи черлериниң бирээзи – «Хааннар шынаазы» базырыктар комплекизиниң девискээринде турар. Ол ышкаш бо угланыышкында Аржаан, Тарлаг, Хадың сумулары, Чкаловка, Малиновка арбаннары болгаш малчын турлаглар бар.
Чаа асфальт-биле шыптынган автоорук транспорт харылзаазын экижидип, тус черниң чурттакчыларының болгаш аалчыларның айыыл чок чоруун хандырар.