Ава – чырык чер кырында адап четпес үнелиг сөс

«Элээди журналист» бөлгүмүнүң кежигүнү, Кызылдың 9 дугаар гимназиязының 6 «в» клазының өөреникчизи Асель Ховалыг Иелер хүнүнге уткуштур авазының дугайында бижээн.

Ием ышкаш чырык черде
Идегелдиг кижи бар бе?
Айдың черде авам ышкаш
Авыралдыг кижи бар бе?

Ава – чырык чер кырында адап четпес үнелиг сөс. Төнчү чок амыдыралдың чаяакчылары, өртемчейниң чаартыкчылары-дыр. «Ава» деп сөс – бичии чаштың бирги адаар сөзү. Ынчангаш «ава» деп сөс чылыг, чымчак, эргим кылдыр адаттынар.

Мээң авам эрестиг, кежээ, шимченгир. Ол истекчи болуп ажылдап чоруур, майор эргелиг. Авамның ажылы дыка берге, харыысалгалыг-даа болза, ол бисти, беш ажы-төлүн, эки өстүрүп, өөредип, чаагай аъш-чемни кылып берип, арыг-силигге, ажылга өөредип четтигип чоруур. Ынчангаш бис ававысты үнелеп, хүндүлеп, хомудатпас бис. Бажың ажылынга үргүлчү дузалажып турар бис.

Бистиң ававыс эң-не чараш, эвилең-ээлдек, эш-өөрзүрек. Ававыска чоргаарланыр бис.