Ниити-российжи улусчу фронтунуң Тывада салбыры ТР-ниң Чазааның деткимчези-биле бо удаада тускай шериг операциязында киржип турар дайынчыларже 50 хире автомашинаны чорударын планнап турар. Ээлчеглиг «Автопоезд» акциязынга «Азас» күрүнениң бойдус камгалалдыг чери каттышкан.
«Бөгүн дөрт дугаар албан чери автомашинаны дамчытканы бо. Акцияның чорудуу-биле дайынчыларже «демир аъттарны» ийи чадага (март төнчүзү, апрель эгези) чорудар. Дайынчы даалгалар күүседип турар чаңгыс чер чурттугларывыска автотранспорт май эгезинде чеде бээр» – деп, Улусчу фронтунуң Тывада штавының кежигүнү Иргек Товарищтай дыңнаткан.
«Азас» күрүнениң бойдус камгалалдыг чери чаңгыс эвес удаа тускай шериг операциязында киржип турар дайынчыларны деткип турар.
– Бо удаада 2015 чылдың техниктиг байдалы эки, артык кезектер-биле чепсеглеттинген (чайгы дугуйлар, чаа камералар, дүлгүүрлер…) ГАЗ «Соболь» маркалыг автобусту дамчыттывыс. Эрткен чылын ийи автомашинаны болгаш өске-даа техниктиг херекселдерни хүлээдип, акша-хөреңгини шилчиткен бис. Ажылдакчыларывыс, тожулар дайынчы оолдарывыска ат салган чаагай күзээшкиннерни автомашинада бижээн. Тиилелге бистии болур! – деп, директоруң оралакчызы Орлан Донгак чуаалаан.
Механик-узаныкчы Адыгжы Назын дайынчы хөделиишкиннер девискээринде мурнуку одуругда тулчуп турар оолдарны деткип, фронтуже чорудар “демир аъттарны” септеп турар. “Амгы үеде УАЗ “Патриоттуң” хөделдирикчизин кылып тур мен. Чагыдып каан артык кезектер кээрге, улаштыр септээр. Даштын септелге негеттинип турар үш автомашина бар” – деп, ол ажылын таныштырган.
Тускай шериг операциязында киржип турар эрес-дидим маадырларга деткимче көргүзери уламчылавышаан. Фронтуже автотранспорт дамчыдар күзелдиг улус «Норзин» Садыг төвүнче (Тыва эки турачылар кудумчузу, 3) кээп болур. Харылзажыр телефону: 2-10-50.
Чуруктарны Буян Ооржак тырттырган
#Ниитироссийжиулусчуфронт #Автопоезд #ТМГМедээлер #Тыва #Тывамедээ #Тывадыл #Тывамедиагрупп #Тува
