Калмыкияның Баштыңы Бату Хасиков Бии-Хем биле Каа-Хемниӊ белдиринде Хавырга дааныӊ эдээ – ыдыктыг күчү-күштүң чери дээрзин соцчеткилерде хууда арынында онзалап демдеглээн.
«Мында, Азия диптиң чүрээнде, Россияда Будданың эң улуг тураскаалы бар. Ыдыктыг тураскаал хөй санныг чүдүкчүлерге болгаш туристерге сорунзаның төвү апарган» – деп, делегей чергелиг IV сарыг шажын шуулганының хүндүлүг аалчызы болгаш киржикчизи бижээн.
Калмыкияның Баштыңы эрткен чылын Тывага бир дугаар аалдап кээп чораан сагындыраал. Ол Кызылга чуртта бир дугаар ажыттынган дээди шажын өөредилге чери – Россияның сарыг шажын университединиң ажыдыышкынынга киришкен.