Кара-Хөлдүң эриинге Бай-Тайга кожууннуң 90 чыл оюнга уткуштур культура ажылдакчыларының чаңчыл болган спартакиадазы болуп эрткенин чагырга чери дыңнаткан.
Спартакиадага сес культура албан чери киришкен. Кандыг-даа үеде, ылаңгыя байырлалдар үезинде, чонга бараан болуп, аңгы-аңгы хемчеглер эрттирип чоруур культура ажылдакчылары бо удаада солун оюн-тоглаага киржип, мага-хандыр дыштанган. Ылаңгыя, Бай-Тал сумузунуң Д. Очур аттыг культура одааның коллективиниң шыырак белеткенгенин комиссия бедик үнелээн.
Ийи хүн уламчылаан маргылдааларның түңнелдери: 1-ги черге Бай-Тал сумузунуң "Эки турачы эскадрон", 2-ги черге кожууннуң төпчүткен ном саңының "Библиобег" командалары төлептиг болган. 3-кү черни кожууннуң уран чүүл школазының "Хөгжүмчүлер" болгаш Кызыл-Даг культура бажыңының "Эзирлер" командалары үлешкешкен.
