Россияның делегей чергелиг спорт мастери, хостуг хүрешке Россияның каш дакпыр чемпиону, хөй санныг бедик шаңналдарның эдилекчизи Сайын Казырык төрээн чери – Бай-Тал сумузунга аалдап четкенин чагырга чери дыңнаткан.
Аныяк чемпион чаңгыс чер чурттуглары-биле ужуражып, спортчу чедиишкиннери-биле үлежип, келир үениң мөгелеринге чагыг-сумезин берген.
Бай-Тайга кожууннуң чагырга даргазы Чингис Салчак, кожуун баштыны Роберт Аракчаа аалчыга байыр чедирип, аныяк мөгеге моон-даа соңгаар бедик спортчу чедиишкиннерни күзээн.
Бай-Тал суму баштыңы Кан Салчак, Элегес спорт школазының башкызы, Бай-Тал оглу Айдыс Дөрбет чаңгыс чер чурттугларының мурнундан Сайын Казырыкка автомашинаны белекке берген. Олар аныяк мөгениң хей-аъды болгаш сүлдези кезээде бедик чоруурун йөрээген.
Бай-Талдың төлептиг оглу чаңгыс чер чурттугларынга өөрү четтиргенин илереткен.
