А.С. Пушкин аттыг национал ном саңының чурт-шинчилел чогаалы болгаш национал библиография килдизинде Тываның Улустуң чогаалчызы, очулдурукчу, сатирик, журналист Василий Монгуштуң 90 харлаанынга «Баштак-хөглүг, чечен-мерген чогаалчы» деп делгелге салдынганын ном саңы дыңнаткан.
Василий Бора-Хөөевич 1935 чылдың декабрьда Чөөн-Хемчик кожууннуң Хөндергей суурга төрүттүнген. Чадаананың бир дугаар школазын дооскаш, Москва хоорайның Ломоносов аттыг университединиң журналистика факультединче өөренип киргеш, 1966 чылда дээди өөредилге черин чедиишкинниг дооскан.
Тываның Улустуң чогаалчызы «Тувинская правда», «Тываның аныяктары» солуннарга килдис эргелекчилеп, редакторлап чораан.
1970 чылда Бүгү-эвилел радиозунуң Тывада тускай корреспондентизи болуп ажылдаан. 1971-1986 чылдарда Тываның ном үндүрер чериниң директору, 1987 чылдан хүндүлүг дыштанылгаже үнгүжеге чедир ТР-ниң Күрүнениң телерадиокомпаниязының директорунуң оралакчызы кылдыр ажылдап чораан.
Чурт-шинчилел чогаалы болгаш национал библиография килдизиниң ажылдакчылары Тываның политехниктиг техникумунуң «Туризм болгаш аалчылар хүлээп алыр» деп тускай мергежилдиң ийиги курузунуң сургуулдарынга В.Б-Х. Монгуштуң 90 харлаанынга тураскааткан «Баштак-хөглүг, чечен-мерген чогаалчы» деп солун хемчегни эрттирген.
Ужуражылганың төнчүзүнде сургуулдар болгаш башкызы килдистиң ажылдакчыларынга өөрүп четтиргенин илереткен.