«Бажың күрүне ачы-дузалары» сервис хөй каът бажыңнарның квартира ээлеринге чуртталга-коммунал ачы-дуза айтырыгларын интернет таварыштыр шиитпирлээр арганы берип турар.
2025 чылдың майда капсырылганың чаа хевири немешкен, ында «төлевирлер корзиназы» деп кезек бар. Ачы-дуза алыкчыларынга шупту төлевирлерни чаңгыс базыышкын-биле төлээр арганы ында бээр. Ол ышкаш «Артык төлевир» деп адыр база бар, ында аванс төлевирлерин кылган улуска немелде төлевир херек бе дээрзин агар саннарындан көрүптер арганы тургускан.
Тывада 10 муң хире ажыглакчы ол капсырылганы киирип алган. Күрүне ачы-дузаларында бүрүткеткен бижиин айтыптарга-ла, капсырылга ала чайгаар коштуна бээр. Шимчевес өнчү-хөреңги дугайында медээлер боду-ла үнүп кээр. Өнчү ээзи эвес чурттакчылар шимчевес өнчүнү башкарар дээш, ээзинден ынаар кирер эргени алыр ужурлуг.
Капсырылгада дараазында чүүлдерни киирген:
- счетчиктерниң сан-чурагайларын дамчыдары;
- коммунал шупту төлевирлерни комиссия чокка төлээри;
- планнаттынган ажылдар болгаш болган озал-ондактар дугайында дыңнадыглар;
- башкарыкчы организацияже дилег бижиктер;
- бажыңның айтырыгларынга хамаарыштыр бадылаашкынга киржири.
Капсырылганы доктаамал сайзыраңгайжыдып турар. Чыл эгезинде хууда бажыңнарны башкарарының аргаларын тургускан болза, чыл төнчүзүнде чуртталга бажыңнарынга хамаарышпас өнчү ээлери сервиске коштунуп эгелээр деп, Россияның Тудуг яамызы дыңнаткан.
