ТР-ниң Тудуг яамызының ажылдакчылары бетон болгаш белен бетон холуксаалары бүдүрер «Өлчей» кызыгаарлаан харыысалгалыг ниитилелдиң бүдүрүлге шөлүнге четкенин яамы дыңнаткан.
«Өлчей» тудуг организациязы Тываның социал-экономиктиг хөгжүлдезининиң амы-хууда программазының чорудуу-биле 2025 чылда мөөрей шилилдезин чедиишкинниг эрткеш, күрүне деткимчези-биле амгы үениң бетон заводун тудуп үндүрүп, тускай техниканы садып алган.
Төлевилелди боттандырып турар үеде 3,43 муң куб метр ажыг бетонну бүдүрген, ол ышкаш тус черниң чурттакчы чонун ажылга хаара тударын хандырып, 43 чаа ажылчын олутту тургускан.
Боттуң тудуг холуксааларының бүдүрүлгези көстүп келгени-биле, республикада тус черниң чиг эдинден кол материалдар бүдүрериниң бөлүүн хевирлээн. Тываже тудуг материалдарын өске регионнардан амдыгаа дээр киир сөөртүп турар болза, боттуң бүдүрүлгелери тудугнуң бот-үнезин чиигедиринге салдарлыг деп, тускай мергежилдиглер санап турар.
