Бии-Хем кожуунда малчын турлагларже комплекстиг унуушкуннер уламчылап турарын чагырга чери дыннаткан.
Бо удаада кожуун чагырыкчызы Алдай-Мерген Ховалыгга баштаткан бөлүк Өөк, Сөш, Сесерлиг, Хүт сумуларының көдээ ишчилериниң аалдарынче чедип, малдың деңгелин, сиген-ширбиил курлавырын, харның кылынын, оруктарның байдалын хынап көрген.
Кожууннуң девискээринде 95 малчын турлагны эрги кезээн, кыштаглаашкын хүр-менди, малчын аалдарже оруктар ажык.
Эмчилер малчыннарны шинчилээн, ном саңының ажылдакчылары номнарны халаска үлээн. Мал эмчилери малдың күш-шыдалын хынап, ветеринарлыг дузаны чедирген. Шагдаа ажылдакчылары профилактиктиг чугааларны чорудуп, көдээ ишчилерде бүрүткеттинген бооларны шыгжаар черлерни хынаан.
Ажылчын бөлүкче кожууннуң көдээ ажыл-агый эргелелиниң, административтиг комиссияның, назы четпээннер талазы-биле комиссияның төлээлери дээш өскелер-даа кирген.