Буянныг үүле-херек Тываның чонун демнештирген

Бо хүннерде Россияда эң улуг дээн «Тубтен Шедруб Линг» азы «Будда Шакьямуниниң Өөредиин тайылбырлаарының болгаш боттандырарының ораны» сарыг шажын хүрээзин ажыдарының белеткел ажылдары чоруп турар.

Тываның чурттакчы чону бир демин көргүзүп, чаа туттунган хүрээниң иштики-даштыкы ажылдарынга дузалажып, буянныг үүле-херекке идепкейлиг киржип турар. Республиканың туберкулезка удур диспансери болгаш Таңды кожуунда салбыры – "Сой" санаторийниң коллективи база өскелерден чыда калбайн, ачы-дузазын көргүскен.

1992 чылда XIV Далай-Лама Тывага кээп чорааш, найысылалдың мурнуу чүгүнде хүрээниң черин болгаш тудуун айызаанын сагындыраал. Чырыткылыг Башкы республикада чаа эр хүрээни өмээржилгеге ап, Будданың үнелиг эдилелдерин болгаш бодунуң адын салганы лама идик-хевин, а ол ышкаш сарыг шажынның ыдыктыг судур-номнарын белекке берген.

Тываның Алдан-Маадыр аттыг Национал музейиниң фондузунда 3000 ажыг шажынчы экспозицияны, ооң иштинде тибет база эрги моол дылдарда хөй санныг шажын номнарын, 1970 чылдарда Кунгуртуг суурнуң чоогунга тывылган Будданың сөстери кирген тибет бижимелдерниң кайгамчык чыындызын хүрээниң бирги каъдынга дериир.

РФ-тиң камгалал сайыды Сергей Шойгунуң эгелекчи саналы-биле К.С. Шойгу аттыг культура фондузунуң деткимчениң ачызында «Тубтен Шедруб Линг» хүрээни тудуп дооскан.

Апрель 28-те чаа хүрээниң байырлыг езу-биле ажыдыышкыны болуп эртер. Аңаа Москва, Хакасия, Бурятия, Калмыкия, Даг-Алтай болгаш өске-даа регионнардан, даштыкы чурттардан аалчылар кээр.

Төөгүлүг болуушкуннуң херечилери апаар кижилерни хөйү-биле хаара тудар дээш, байырлыг ажыыдыышкын езулалын онлайн-дамчыдылга таварыштыр көргүзер.