Россияның Президентизи Владимир Путинниң эгелээшкини-биле «Узун болгаш идепкейлиг назын» национал төлевилел езугаар баштайгы кадык камгалалының эгеки чадазын эде чаартыр программа-биле чоокта чаа үндезин септелге чоруткан Чөөн-Хемчиктиң хөй талалыг ажыл-чорудулгалыг эмнелге төвүнде хирургия салбырының оран-савазында реабилитация салбырын албан езузу-биле ажыткан.
Чөөн-Хемчиктиң кожууннар аразының эмнелге төвүнүң кол эмчизи Шораана Ховалыг ыраккы көдээ кожууннарда дээш, кадык камгалалының материал-техниктиг баазазын экижидер арганы бергени дээш республиканың удуртулгазынга коллективиниң өмүнээзинден өөрүп четтиргенин илереткен. Ол ышкаш Тываның Баштыңы Владислав Ховалыг биле кадык камгалал сайыды Анатолий Югайның төлевилелдерни чедиишкинниг камгалап, таваандан эгелээш, оран-саваны ажыглалче кииреринге чедир ажылдың шупту чадаларында тудугнуң шынарын хууда хайгааралга алган турганын ол демдеглээн.
«Көдээ черниң эмчизи» программаның киржикчизи, хирург, онколог, УЗИ-мергежилдиг эмчи Милада Ондар чаартынган оран-сава аянныг, чырык, делгем апарганын демдеглеп, чаа салбырның дугайында бодалдары-биле үлешкен. Салбырда соңгаарлаттынмас болгаш планныг кезиишкин кылыр ийи операция өрээлдери бар, ол ышкаш амгы үениң лапароскоптуг дериг-херекселин ажыглап тургаш, аартпайн кезиишкинни кылыр арга тургустунган. Орунда чыдар аарыг кижилерниң байдалын дорт хайгаараар чаа дериг-херекселдерни өрээлдерде салган.
Ажылдакчыларга болгаш эмчилерге эптиг болзун дээш, ординатор, чем кылыр болгаш душтуг арыгланыр өрээлдерни тускайлаан. Төлевилел күүселдези-биле аарыг кижиниң бедиин болгаш олурда деңзизин хемчээр электроннуг деңзилер дээш, амгы үениң эмчи реабилитациязының 46 дериг-херекселин тургускан. Эмнелгеге чыдып эмнедир технологияларны солуп, аарыг кижиге таарымчалыг байдалды экижидер дээш, 27 оруннуг “хүндүскү стационар” база ажыттынган.
Бо чылын «Узун болгаш идепкейлиг назын» национал төлевилел күүселдези-биле Чөөн-Хемчик кожуунда беш фельдшер-акушер пунктузу туттунуп турарын демдеглээри чугула.