Мугур-Аксы суурнуң 1 дугаар школазындан биология башкызы Чечек Конзай «Россияның чылдың башкызы» бүгү-российжи мөөрейге Тываны төлээлээнин республиканың немелде өөредилге сайзырадыр төвү дыңнаткан.
Бо хүннерде Белгород хоорайда мөөрейниң түңнел чадазының чугула шенелделери эртип турар. Россияның тергиин башкызы деп ат дээш бүдүн чурттан 89 башкы демисежип турар. Олар – мөөрейниң регионалдыг чадазының тиилекчилери.
Түңнел мөөрейниң бирги чадазы сентябрь 9-тан 16-га чедер. Бистиң чаңгыс чер чурттуувус, Мугур-Аксы школазының башкызы сентябрь 13-те 9-ку классчыларга биология эртеминге ажык кичээлди эрттирген.
Бирги турнуң түңнелдери-биле жюри кежигүннери 20 лауреатты шилиир, олар кол шаңнал дээш демиселди уламчылаар. Тиилекчилерни болгаш «Россияның чылдың башкызы» аттың эдилекчизин сентябрь 16-да чарлаар.
