Шагаа байырлалы уткуштур тускай шериг операциязының киржикчилерин деткээн ачы-дуза чыылдазында бүгү республика идепкейлиг киржип турар.
Тываның Чазааның деткимчези-биле «Улусчу фронт. Бүгү чүүлдү тиилелгеже!» төлевилелди боттандырып, Шагаа уткуштур дузаламчы чыыр ажылды чоруткан.
Бөгүн Мөңгүн-Тайга, Чаа-Хөл, Бии-Хем, Эрзин, Чөөн-Хемчик, Өвүр кожууннарның төлээлери дайынчыларга ээлчеглиг ачы-дузазын дамчытктан.
Мөңгүн-Тайга кожууннуң чагырга даргазы Эртине Успун Шагаа уткушкур дайынчыларже үш сарлык, ийи аът эъдин, 10 хааржак тырткан эътти, какпактаан сарлык эъдин, консервалаан кадыргыны, үш генераторну, үш бензин-биле ажылдаар хирээни, ийи агаар үрдүрүкчүзүн, чажыртынып шыптынар четкилерни дээш дайынчыларга оон-даа өске чүүлдерни эккелгенин дыңнаткан.
Чөөн-Хемчик кожууннуң чурттакчыларындан чүъктү чагырга даргазы Айдыс Куулар дамчыткан. Ында 600 ажыг кил аът, инек болгаш хой эъди, Чадаана хоорайның хууда сайгарлыкчыларындан мотоцикл, бензин-биле ажылдаар хирээлер дээш өске херек чүүлдер бар.
«Орук шимчээшкинин организастаар төп» кызыгаарлаан харыысалгалыг ниитилел генератор, бензин-биле ажылдаар хирээ, стабилизаторну, Кызылдың хоочуннар чөвүлелиниң кежигүннери амданныг бооваларны болгаш оңгуга ажыглаар лааларны ачы-дуза чыыр пунктуга дужааган.
Кожууннарның төлээлери бода, чылгы болгаш шээр малдың доңурган эъдин, аъш-чемни, генераторларны, агаар үрдүрүкчүлерин, бензин-биле ажылдаар хирээлерни, чажыртынып шыптынар четкилерни дээш дайынчыларга оон-даа өске херек чүүлдерни эккелген.
Ай санаашкыны-биле Чаа чыл – Шагаага уткуштур дайынчыларга ачы-дуза чедирер акция февраль 10-га чедир уламчылаарын сагындыраал.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы), Правобережная кудумчузу, 4 (Көдээ ажыл-агый рыногу). Харылзажыр телефону: +7 (39422) 2-10-50.