Делегей чергелиг IV сарыг шажын шуулганның кол хемчеглер программазын парлаан

Делегей чергелиг IV сарыг шажын шуулганның албан езузунуң сайтызы (buddhaforum.ru/) келир болуушкуннуң кол хемчеглер программазын парлаан. Организаторлар программа өскерлип болурун дыңнаткан, ынчангаш шуулганга сонуургалдыг болгаш хемчеглерге киржир күзелдиг кижилерни медээлер курлавырлары – МАКС (max.ru/worldbuddh...) болгаш ТГ (t.me/WorldBuddh...) мессенджерлерге база ВКонтакте (vk.ru/worldbuddhistforum) социал четкиде арыннарга бижиттирип алырын кыйгырган. Шупту медээлер ол дораан сайтыга үнүп турар.

Шуулганның программазында регионнуң шажын-чүдүлге болгаш культура өнчү салгалын ажыдып, ооң бот-тускайын болгаш хүндүлээчелин көргүзер сорулгалыг культура-массалыг хемчеглер кирген. Бо хемчеглерге Тываның чурттакчылары-даа, аалчылары-даа киржип болур. Аккредитациялыг шуулган киржикчилеринге эртем болгаш ажыл-агыйжы хемчеглер база бар. Аңаа эртемденнер, шажын ажылдакчылары, хөй-ниити баштыңнары болгаш эксперттер сарыг шажынны сайзырадырынга амгы үениң айтырыгларын сайгарар.

2026 чылдың август 17-ден 20-ге чедир Тываның төвү Кызылга делегей чергелиг IV сарыг шажын шуулган болуп эртерин сагындыраал. Аңаа бүгү Россиядан болгаш делегейден шажын-чүдүлге, эртем төлээлери, туристер чыглыр. Бо хүннерде болур хемчегге улуг белеткел ажылдары регионда чоруп турар.