Чагытай хөлге дош адаандан балыктаарынга республика чергелиг маргылдаа болуп эрткенин Таңды кожууннуң чагыргазы дыңнаткан.
Балыктаарынга сонуургалдыг чалыылардан эгелээш арга-дуржулгалыг балыкчыларны спортчу хемчег каттыштырган. Сөөлгү минуталарга чедир кым тиилекчи болуру билдинмес турган. Маргылдааның түңнелдери-биле Чаа-Хөл кожууннуң командазы бирги черни бүзүрелдии-биле чаалап алган.
Чаа-Хөлден Херел Дадый 790 грамм, Кызыл кожуундан Артур Шалык 660 грамм деңзилиг калбак-балыкты туткан. Чеди-Хөлдүң хоочун балыкчызы Станислав Бөлгүм-оол үшкү черде, ол Чагытайга маргылдааларның доктаамал киржикчизи.
Чеди-Хөлден Херел Оюн дошту кымдан-даа дүрген өрүмнээш, тиилээн. Ийиги-үшкү черлерни Чаа-Хөл кожууннуң төлээлери алган.
Эң улуг назылыг балыкчы – Сергей Ондар, эң бичии киржикчи – дөрт харлыг Амыр-Санаа Санаа.
Эң улуг балыкты (910 грамм калбак-балык) Кызыл хоорайның төлээзи туткан.
Тиилекчилерге дириг хойну, өртектиг белектерни, балыктаар херекселдерни тывыскан. Идепкейлиг киржикчилер балык садыындан сертификаттарны алган.
Таңдының аңчылар болгаш балыкчылар ниитилели балык тудар маргылдааны бедик деңнелге эрттирген.
