«Эдегей» костюм болгаш сам театры Күрүнениң Кремль ордузунга улуг концертин көргүзер

Апрель 30-де Күрүнениң Кремль ордузунуң сценазынга Вячеслав Донгактың чогаадыкчы коллективи «Эдегей» костюм болгаш сам театры «Вячеслав Донгак: өгбелерниң өнчүзү. Уран чүүлде мөңге үе» концерт программазын бараалгадыр.

Удавас болур концерт шылгараңгай хореограф, тургузукчу-режиссер, дизайнер-модельер Вячеслав Донгактың чогаадыкчы өнчүзүнге тураскааткан кол этнокультурлуг болуушкуннарының бирээзи апаар.

Чурттуң улуг сценазынга оюн-көргүзүүн бараалгадыры коллективке улуг ужур-уткалыг. Күрүнениң Кремль ордузу бедик шынарлыг уран чүүл болуушкуннарының төрүттүнер болгаш эң-не дээре культурлуг ужур-чаңчылдарны кадагалап турар шөл кылдыр санаттынар. Ол кежээ көрүкчүлер национал самының кайгамчык күжү, сцена хептериниң онзагайы, өгбелериниң сүлде-сүзүү-биле ханы харылзааны каттыштырган улуг хемчээлдиг көргүзүгнү көөрлер.

Вячеслав Донгактың чогаадыкчы ажылы амгы үениң уран чүүлүнде онзагай болуушкун апарган. Ооң уран-чечен дылы чоннуң езу-чаңчылдарын, шимчээшкинниң энергиязын, национал хептиң эстетиказын каттыштырып, таныттынмас болгаш бот-тускайлаң сцена аян-хевирин чогаадып тургускан.

«Бо дээрге чүгле концерт эвес, а чурттуң кол сценазынга Вячеслав Донгактың чогаадыкчы өнчү-салгалын кадагалап, хүндүткелди бараалгаткан тускай мөгейиг-дир. Чоннуң уран чүүлүн, ужур-чаңчылдарын, культурлуг сактыышкынын үнелээр шупту кижилерге онзагай болуушкун апаар кылдыр бо кежээни эрттирерин кызыдар бис» – деп, театр демдеглээн.

Концерт чүгле шылгараңгай мастерге чүгле мөгейиг сактыышкын эвес, а ооң чогаадыкчы оруунуң көскү уламчызы болур. «Эдегей» театрның артистери салгалдарның уламчызын, ук-ызыгуурунга хүндүткелди, национал культурага амгы үениң тайылбырын төөгээн программаны бараалгадыр.