Национал школа хөгжүдер институттуң ажылдакчылары “Чаштарга эртем” төлевилелин боттандырып Кызылдың 9 дугаар гимназиязы, Бай-Тайганың Кызыл-Даг ортумак школазының өөреникчилериниң аразынга “Көшкүн чоннуң өө” эртем-практиктиг конференцияны удуртуп эрттиргенин институт дыңнаткан.
Бирден 4-кү класстар аразынга 11 өөреникчи, 5-тен 6-гы класстар аразынга 9 өөреникчи илеткээн. Оларның аразында 4 “б” класстың өөреникчизи Мирослав Дүпчүрнүң “Мөгениң девиглериниң хевирлери” деп шинчилээн ажылы, 4 “а” класстың өөреникчизи Алина Оолактың “Мээң аймаамның оваазының дагылгазы” деп ажылы, Виктория Хертектиң “Тыва өгнүң бойдус-биле харылзаазы” деп ажылы, Тэмуджин Кууларның "Мээң адым" деп шинчилели солун болган. Ортумак класстың өөреникчилериниң аразынга 6-гы класстың өөреникчизи Очур Хертектиң “Өгде геометрия” болгаш 6 “г” класстың өөреникчизи Аделина Назытының “Тыва улустуң чаңчылчаан күш-ажылы – ак кидисти салырының технологиязы” деп шинчилелдери кичээнгейни хаара туткан.
Уругларның угаан-медерелин, сөс-домаан сайзырадып, ада-өгбелеривистиң езу-чаңчылдарын, амыдыралындан дуржулгазы-биле таныштырып, оларның келир үеде эртем-билиглиг, кижизиг, бедик тура-соруктуг болурунга ук төлевилел дузалыг дээрзин башкылар демдеглээн. Оон аңгыда сонуургалдыг ада-иелер ажы-төлүн деткип, конференцияны дыңнап келгеннер.