Тывада муниципалдыг ном саңнарының септелгези уламчылап турар, 2026 чылда Улуг-Хем биле Чаа-Хөл кожууннарның төп уруглар саңнары, Таңды кожууннуң Кочетовта көдээ ном саңының салбыры, Өвүр кожууннуң Солчур көдээ ном саңы, Тес-Хем кожууннуң Берт-Даг көдээ ном саңының салбыры амгы үениң ном саңы эрге-байдалды алырлар.
Чурттуң культурлуг хүрээлеңин хөгжүдеринче болгаш аңгы-аңгы назы-харлыг кижилерни культурлуг үнелиг чүүлдерже хаара тудар сорулгалыг «Өг-бүле» национал төлевилелдиң «Өг-бүлениң үнелиг чүүлдери болгаш культура инфратургузуу» федералдыг программазы езугаар ном саңнарының эде чаартылгазы 2025 чылдан чоруп турар.
Келир чылын улуг септелгелер эртер шупту культура албан черлеринде белеткел ажылдары эгелээн. Чижээлээрге, Берт-Даг көдээ ном саңы эрги номнар фондузун үндүр бижип, септелгеге белеткенип эгелээн. Тываның А. С. Пушкин аттыг национал ном саңы культура объектилериниде чаартылгаларны удуртуп, программаның бедик шынарлыг күүселдезин харыылаар төлевилел офизи болуп арткан.
Бо чылын Ак-Довуракта, Туранда, Тожу кожууннуң Тоора-Хем суурда үш ном саңы эде чаартынган: амгы үениң септелгезин эрткен, чаа дериг-херекселдерни болгаш эт-септи салган, ном фондузу немешкен. Библиотекарьларның демдеглээни-биле алырга, чаартылгалар соонда, уругларның-даа, улуг улустуң-даа албан черинче келири болгаш сонуургалы улгаткан.
«Культура албан черлери чаа тынышты ап, кандыг-даа назылыг кижилерни хаара тудар езулуг төптер болуп, аянныг дыштаныр черлер апарып, кижи бүрүзү бодунуң чаа арга-шинээн ажыдып, номчулганың илби-шидизин билип, чаа-чаа көрүштерни тыпкан» – деп, ТР-ниң Культура яамызы демдеглээн.