Улуг-Хем кожууннуң Хайыраканда хоочуннар болгаш харык-шинээ кызыгаарлыг хамаатыларга дазылга бажыңының коллективи улуг назылыгларга интернаттың девискээринге дуган тудар ачы-дуза марафонун эрттиргенин чагырга чери дыңнаткан.
Тываның Камбы-Лама Гелонг Лоден Шераб сарыг шажын чүдүлгезиниң дугайында тайылбырлап, Херел башкы-биле кады номналды номчаан.
Архитектор Михаил Куулар төлевилел-санаашкын документизин кылып, дуганның төлевилелин чуруп белеткээнин таныштырган.
Тывада сарыг шажынның ыдыктыг черлериниң бирээзи, 1992 чылда Чырыткылыг XIV Далай-Лама Башкывының ыдыктап кааны, Хайыракан даа. Ынчангаш Хайыракан дааның эдээнде дазылга бажыңынга дуган тудары улуг буян болурун аалчылар демдеглеп, боттарының өмүнээзинден база ажылдап турар коллективтериниң мурнундан акша-төгерикти өргээн.
Тываның Чазааның, Дээди Хуралының, Күш-ажыл болгаш социал политика яамызының төлээлери, Сукпакта, Чадаанада, Кызылда болгаш оон-даа өске кожууннарда интернаттарның директорлары база ачы-буян марафонунга киришкен.
Чоннуң чыгган, шилчиткен, сертификаттар тывыскан акша-төгерии 462 муң чеде бергенин марафоннуң комиссиязы дыңнаткан. Оон ыңай тудуг үезинде бир хой, бир тонна цемент бээрин база аазаан.
Ачы-дуза чедирери мооң-биле кызыгаарлаттынмаан. Хайыраканның дазылга бажыңының директору Чойганмаа Сайлык-ооловна дуганны тудуп турар үезинде немей тудуг материалдарын садарынга, тудугжуларны ажыл үезинде ашкарып-чемгерери дээш чарыгдалдар-ла хөй боор, ынчангаш тудуг доозулгуже чедир дуза чедирер ажыл уламчылаарын дыңнатпышаан, өргүл кылган чонга четтиргенин илереткен.
Тываның алдарлыг артистери Ляна Өндүр, Омак Ооржак, Тываның улустуң хөөмейжилери Андрей Монгуш, Игорь Көшкендей, «Он-Кум» мода болгаш костюм театры ыры-хөгжүмү-сам-биле көрүкчүлерге солун концердин бараалгаткан.