Тожу кожуунда Хамсыра хемни кежир чаа көвүрүг ажыттынган. Чаа автомобиль көвүрүү Ырбан биле Ий суурларны кожууннуң өске-даа девискээрлери-биле харылзаштырып, чурттакчы чоннуг аай-дедир аргыжылгазынга таарымчалыг байдалдарны тургускан.
Хамсара көвүрүү Тожунуң транспорт инфратургузуунуң чугула объектизи апарган. Дыка хөй чылдар дургузунда хемни кежери чылдың үезинден дорт хамааржып, суурлар аразында аргыжылганы, хандырылга айтырыгларын база чонга социал ачы-дуза чедирилгезин бергедедип турган.
«Ареал» компаниязы 256 метр узун, ийи талалыг чаа көвүрүгнү тудуп кылган. Көвүрүгнүң күчүзүн 100 тонна чедирип, бүдүн чыл дургузунда айыыл чок шимчээшкинни хандырар арганы берген.
Чаа көвүрүг Ырбан биле Ийниң чурттакчыларынга өске суурлар-биле бүзүрелдиг харылзааны хандырар. Ам аъш-чем болгаш чугула барааннар сөөртүлгезиниң, эмчи дузазын көргүзериниң, эртем чедип алырының, күрүне болгаш социал ачы-дуза чедирилгезиниң байдалдары экижиир.
«Тожунуң чурттакчыларынга бо чугула объект-дир. Кызымаккай күш-ажылы болгаш харыысалгалыг чоруу дээш, тудугжуларга четтиргеним илереттим. Чаа транспорт судалы Тожунуң хөгжүлдезинге быжыг үндезин апарып, кожуунга чаа перспективаларны ажыдар дээрзинге бүзүрээр мен» – деп, Тываның Баштыңы Владислав Ховалыг МАХ-та бодунуң каналынга бижээн.