Тывада арага болгаш спирт холумактыг барааннарны хоойлуга удур садып-сайгарары-биле демисежир албан черлер аразының «Суррогат» деп профилактиктиг операциязы чоруп турар.
Бо операция 2030 чылга чедир регионга арага ижерин эвээжедир концепцияны боттандырар дээш чорудуп турар. 2025 чылдың төнчүзүнге чедир күүселде, хыналда болгаш профилактика хемчеглериниң комплекстиг комплекизин боттандырар.
Декабрь 30-ге чедир корум-чурум камгалаар органнар тус чер чагыргалары-биле кады арага продукциязын хоойлуга удур садып турар деп каразыттырган садыг черлерин хынаар. Чаңгыс аай күрүнениң автоматчыткан информация системазынче садыгларны кошканын хынап, садып алыышкыннар медээлериниң сайгарылгазынче онза кичээнгейни угландырар.
Кожууннарда хөй-ниити корум-чурумун тудар пунктуларынга, ол ышкаш «Шивилиг» доскуулунга регионче арага аймаан хоойлуга удур киирбес дээш, улусчу дружиналарны хаара тутпушаан, дежурныйлаашкынны күштелдирер.
Хөй-ниити черлеринде эзирик кижилерни илередип, улаштыр тускай албан черлеринче сугар хемчеглер база болур. Ол ышкаш арагалаар кижилер болгаш чогумчалыг эвес өг-бүлелер-биле профилактиктиг ажылдарны база чорудар.
Республиканың өөредилге черлеринге назы четпээннерге амыдыралдың кадык овур-хевириниң дугайында лекцияларны эрттирер. Күрүне албан черлеринге эзирик машина мунуп болбас деп өөредигни бээр. Хоойлуга удур арага садыглаашкыны дээш шииткелдерниң болгаш араганың салдарының дугайында медээлерни өөредилге, медицина, социал албан черлери болгаш оперативтиг албан черлериниң социал четкилерде арыннары таварыштыр идепкейлиг тарадыр.