Тываның беш муниципалдыг тургузугларында хөй-ниити шөлдерин чаагайжыдар төлевилелдер талазы-биле садыглажылганы чарлаан. Суурларда амыдырал-чуртталганың шынарын бедидеринче угланган «Көдээ черлерниң комплекстиг хөгжүлдези» күрүне программазы-биле ажылды чорудар.
Тудар азы чаартыр кылдыр планнаан объектилер даңзызында:
- Барыын-Хемчик кожууннуң Кызыл-Мажалык суурда скейт-парк;
- Бай-Тайга кожууннуң Тээли суурда база Эрзин кожууннуң Эрзин суурда спорт шөлдери;
- Кызыл кожууннуң Терлиг-Хая суурда база Чаа-Хөл кожууннуң Ак-Дуруг суурда уруглар ойнаар шөлдер кирген.
ТР-ниң Экономиктиг хөгжүлде болгаш үлетпүр яамызының дыңнатканы-биле алырга, төлевилелдерни федералдыг, республика, тус черниң бюджеттеринден, ол ышкаш бюджеттен дашкаар «Кедилиг даг-руда төлевилелдери» акционерлиг ниитилел биле «Тардан Голд» «Тардан Голд» кызыгаарлаан харыысалгалыг ниитилелдиң инвестицияларындан акшаландырар.
«Көдээ девискээрлерниң комплекстиг хөгжүлдези» күрүне программазы чүгле чурттакчыларга таарымчалыг байдалды тургузарындан аңгыда, аныяк тускай мергежилдиглерни көдээ суурларже хаара тудар сорулгалыг. Тываның кожууннарында социал инфратургузугну хөгжүдеринге бо төлевилелдерниң күүселдези чугула базымны бээр.
2025 чылда программаны доозуп тура, республиканың дөрт муниципалдыг тургузугларында тудуг төлевилелдери боттандырганын сагындыраал: Тес-Хем кожууннуң Самагалдай суурда роллердром-скейт-парк, Бай-Тайганың Ээр-Хавак суурда универсалдыг спортчу болгаш уруглар ойнаар шөл, Кызыл кожууннуң Сукпак суурда ургулар ойнаар шөл база Өвүр кожууннуң Хандагайты суурда «Россия – Тыва» тураскаал чаагайжыттынган.
Сөөлгү беш чылда 43 хөй-ниити черин септеп, эде-чаартып, чаагайжыткан.