Каа-Хем кожуунда школалар септелгезин хынаан

ТР-ниң Чазак Даргазының оралакчызының албан-хүлээлгезин күүседип турар Айдын Чюдюк Каа-Хем кожуунче ажыл-агыйжы сургакчылаашкын-биле кээп чораанын кожууннуң чагырга чериниң даргазы Евгений Ооржак дыңнаткан.

Ажылчын бөлүк кожуунда үндезин септелге чоруттунуп турар өөредилге оъбектилериниң капитал септелгезин хынап көрген.

Бо чылын «Школа системазының чаар¬тылгазы» федералдыг программаже Сарыг-Септиң С. К. Тока аттыг 2 дугаар болгаш Бүрен-Аксы школалары кирген.

Бүрен-Аксыда үндезин септелге доозулган. Чаа өөредилге чылында чаартынган школазынга 70 ажыг оолдар болгаш уруглар парталар артынга олурупкаш, өөренип кириптерлер. Сарыг-Септиң 2 дугаар школазында 400 хире школачы өөренип турар. Ында септелге ажылдары уламчылап турар.

Айдың Чюдюк хүлээникчи тудуг организациязының төлээлери-биле ужуражылга үезинде школаның септелгези август 1-ге чедир доостур ужурлуг дээрзин айыткан.