Чурттуң школаларынга сентябрь 1-ден эгелээш, «Коңга орнунга аялга» бүгү-российжи төлевилел уламчылаарын республиканың немелде өөредилге сайзырадыр төвү дыңнаткан.
Кичээлдиң эгезин болгаш төнчүзүн коңга медээзи эвес, а совет болгаш амгы үениң авторларының билдингир ырылары-биле чарлаар. Сентябрь айда өөреникчилерге дараазында ырыларның аялгаларын салыр: «Дважды два – четыре», «Песня Первых», бирги классчыларга – «Первоклашка». Оон аңгыда сураглыг «Учат в школе» деп ыры чыындыже кирген.
Россияның чырыдыышкын сайыды Сергей Кравцовтуң демдеглээни-биле алырга, ук төлевилел школаларга байырланчыг болгаш чылыг-чымчак байдалды тургузар, уругларны чурттуң хөгжүм салгалы-биле таныштырар болгаш, школачыларның сонуургалын оттурар.
«Төлевилел уругларның билиин бедитпишаан, чугула чырыдыышкын хүлээлгени күүседип турар» – деп, яамының удуртукчузу демдеглээн.