Тываның Баштыңы Владислав Ховалыгның даалгазы-биле Чазак кежигүннери, яамылар болгаш албан черлериниң удуртукчулары, Дээди Хуралдың депутаттары, билдингир болгаш хүндүткелдиг кижилерниң киржилгези-биле республиканың чурттакчылыг черлеринге чон чыыштары болуп турар.
Бо ужуражылгаларның сорулгазы – кем-херек үүлгедиишкиннерин, орук озал-ондактарының санын эвээжедири база арага-биле холбашкан Корум-чурум үрээшкиннерин болдурбазы база хоойлуга удур арага садар чорук-биле демисежири болган.
Чон чыыжынга мөзү-бүдүш кижизидилгезин нептередиринге, өг-бүлениң үнелиг чүүлдерин деткииринге, арага ижеринге удур хамаарылганы кижизидеринге киржип турар адалар чөвүлелдери, херээженнер эвилели дээн ышкаш хөй-ниити организацияларының төлээлери, хүндүткелдиг хоочуннар, ат-сураглыг спортчулар, шажын чүдүлге ажылдакчылары киржип турар.
Тываның Чазак Аппаратының регионалдыг айыыл чок чорук департаментизиниң дыңнатканы-биле алырга, муниципалдыг тургузуглар чон чыыштарының графигин ажылдап кылган. Сөөлгү беш ай дургузунда 33 ужуражылга эрткен, аңаа дөрт муң хире идепкейлиг чурттакчылар киришкен. Департамент ажылдакчылары айытканы болза, социал чугула айтырыгларны сайгарып көөрүнче, ылаңгыя корум-чурум үрээшкиннерин болдурбазынга хамаарыштыр тускай шиитпирлерни хүлээп алырынче хамаатыларны идепкейлиг хаара тудар боттуг арга болуп турары бадыткаттынган.
Бо неделяда Тожу кожууннуң Адыр-Кежиг, Сыстыг-Хем, Тоора-Хем суурларга, Чеди-Хөл кожууннуң Хову-Аксы, Сайлыг суурларга, Мөңгүн-Тайга кожууннуң Мугур-Аксы суурга, Ак-Довурак хоорайга чон чыыштары болуп эртер.
Владислав Ховалыг чурттакчылыг черлерге чон чыыштарын эрттирер чаңчылды чаа 2026 чылда уламчылаарын дааскан. Регионалдыг айыыл чок чоруунуң департаментизи Чаа чылдың байырлал хонуктарында муниципалдыг тургузугларында амыдырал-хандырылга инфратургузуун хынап, тус черлерге чон чыыштарынга киржир кылдыр чазак кежигүннериниң үнүүшкүннер графигин тургускан.