Россияның кеземче күүселдезиниң Тывада эргелелиниң чанында хөй-ниити чөвүлели хоругдал чериниң ийи дугаар эдип-чазаар эмнелге албан черинде база үш дугаар эдип-чазаар колонияда шииттирген херээжен улуска «Кызыл – Азия диптиң чүрээ» деп өөредиглиг экскурсияны организастаанын эргелелдиң парлалга албаны дыңнаткан.
Хөй-ниити чөвүлелиниң даргазы, аттестация эрткен үдекчи Радмила Оюн экскурсияны эрттирген. Ол хүн онзагай болган, чүге дизе улустуң билир кудумчулары болгаш бажыңнары өске талазындан ажыттынган: оран-сава, бажың бүрүзүнүң артында – төөгү, шөл бүрүзүнүң артында – үе.
Экскурсияның киржикчилери онза солун черлер-биле таныжып, кудумчуларның болгаш бажыңнарның төөгүзүнден солун барымдааларны билип алган. Ол ышкаш делегей чергелиг IV сарыг шажыг шуулганының бүдүүзүнде хоорай кайы хире чаартынып турарын көрген.
Солун болгаш өөредиглиг экскурсия ооң киржикчилеринге социал ижигиишкинче идигни бергенин эрттирикчилер демдеглээн. Селгүүстээшкин үезинде олар хөй айтырыгларны салып, көрген чүүлдерин идепкейлиг сайгарып чугаалашкан.
Хемчег бот-сайзырал болгаш тыва эки турачыларның төөгүзүнге тураскааткан номнарны сөңнээри-биле доозулган.
