Тускай шериг операциязының киржикчизи, ефрейтор Дмитрий Оюннуң чырык адынга тураскааткан «Эрес-дидим чоруктуң кубогу» баскетбол маргылдаазын маадырның чоок кижилери ийи дугаар чыл эрттирип турар.
Бо удаада «Тиилелге» спорт-культура төвүнге республиканың аңга-аңгы булуңнарындан 12 харга чедир оолдар болгаш уруглар чыглып, маргылдашкан. Эрес-дидим чоруктуң кубогунуң тиилекчилери – оолдар аразынга «Сүбедей» командазы база Бай-Тайганың кыстары. Тиилекчилерге өртектиг, чигирзиг белектер болгаш акша шаңналдарын тывыскан.
Маадырның кады төрээн угбазы Долаана Оюннуң дыңнатканы-биле алырга, 2027 чылда, дуңмазының үш чылында база маргылдааны эрттирер. Эрткен чылын Д.Д. Оюннуң чоок улузу спортчу хемчегни эрттиреринден аңгыда, Тываның баскетболга чыынды командазының «Сибирь кубогунче» оруунуң өртээн база төлеп берген.
Бо чылын спортчу хемчегни ТР-ниң Спорт яамызының база ТР-ниң Баскетбол федерацияның деткимчези-биле эрттирген.
2025 чылда Р-257 «Енисей» федералдыг оруктуң 800 дугаар километринде Дмитрий Оюннуң адын мөңгежидип, тураскаат самбыраны ажыткан. Аңаа ТР-ниң Орук-транспорт яамызының, орук албан черлериниң удуртулгазы маадырның дугайында чылыг сактыышкыннарны кылып, самбыра баарынга чечектер салыр езулалга киришкен. Чалыы спортчулар база дайынчыга хүндүткелин илередип, ада-чуртчу хемчегге келген.
Арга-дуржулгалыг көвүрүглер тургузар тускай мергежилдиг орукчу «Тываавтоорук», Федералдыг орук агентилелиниң «Енисей» автоорук эргелелинге удуртукчу болгаш харыысалгалыг албан-дужаалдарга ажылдап турган. Ол Тываның орук адырын хөгжүдеринге улуг үлүг-хуузун киирген.
Дмитрий Оюн 2024 чылдың апрель 27-де Донецк Улус Республиканың Старомайорское суурну хостап тургаш, езулуг маадырлыг чоруун көргүскеш, амы-тынындан чарылган. Маадырның өөнүң ишти биле үш ажы-төлү арткан.
Дмитрий Оюнну Эрес-дидим чоруктуӊ ордени-биле мөчээн соонда шаңнаан.
