Тываның школачыларының аразынга бүгү-российжи «Президент маргылдаалары» спортчу маргылдааларының регионалдыг чадазы доозулган. Аңаа шилилгелерге тиилээн он бир шыырак команда киришкен.
Школачылар спорттуң бүгү талалыг хевирлеринге, шимченгир оюннарга, теоретиктиг мөөрейге, эстафета чарыжынга маргылдашкан. Чалыы спортчулар чогаадыкчы мөөрейге болгаш спортчу туризмге база боттарын көргүскен.
Көдээ класстар командаларының аразынга Аржаан школазының өөреникчилери (тренер башкызы Тимур Дапы) тергиидеп, тиилекчилер болганынга аржаанчылар чоргаарланып турар.
Тиилекчи команданың спортчуларынга Тываның Өөредилге болгаш Спорт яамыларының дипломнарын, херечилелдерни, кубоктарны, медальдарны тывыскан.
Сентябрь эгезинде Аржаан школазының алдыгы классчылары Бүгү-россияның «Орленок» уруглар төвүнге Тываның адын камгалаар.
